Монголын Спортын Сэтгүүлчдийн Холбоо

“Парис-1924” Зуны Олимпын наадмын үеэр зургаан сэтгүүлч санал солилцоод Олон улсын спортын сэтгүүлчдийн байгууллагыг үүcгэхээр тохирсон байдаг. Улмаар маргааш нь буюу 1924 оны долдугаар сарын 2-нд 20 гаруй орны сэтгүүлч цуглан, Олон улсын спортын сэтгүүлчдийн холбоог байгуулсан түүхтэй. Боксын рингэнд хуралдсан энэхүү түүхт үйл явдал хожим нь дэлхийн 170 гаруй орныг нэгтгэсэн AIPS хэмээх том байгууллагын эхлэлийг тавьсан аж.

Монгол Улсын хувьд, 1990 онд спортын сэтгүүлч С. Түвдэнням, А. Баярмагнай, Р. Чулуун, Ж. Отгонцагаан тэргүүтэй биеийн тамир спортоор дагнан бичдэг сэтгүүлчид санаачлан Монголын спортын сэтгүүлчдийн холбоо (МССХ)-г байгуулсан түүхтэй. МССХ-ны анхны ерөнхийлөгчөөр “Спортын мэдээ” сонины эрхлэгч С. Түвдэнням, түүний дараагийн ерөнхийлөгчөөр МҮОХ-ны ерөнхий нарийн бичгийн дарга Ж. Отгонцагаан, спортын зүтгэлтэн Ч. Отгонбаатар нар ажиллаж байв.

МССХ нь 1992 онд Олон улсын спортын сэтгүүлчдийн холбоо (AIPS) болон Азийн спортын сэтгүүлчдийн холбоо (AIPS Asia)-нд гишүүнээр элссэн билээ. Өдгөө МССХ нь телевиз, сонин, вэбсайт, фото зураг зэрэг чиглэлээр ажилладаг 80 гаруй гишүүдийг эгнээндээ нэгтгэсэн бөгөөд 2021 оноос Монголын спортын сэтгүүлчдийн холбооны ерөнхийлөгчөөр сэтгүүлч Б. Цагаанбаатар, ерөнхий нарийн бичгийн даргаар МҮОНТ-ийн редактор Д. Батжаргал нар ажиллаж байгаа юм.

Тамирчдынхаа алдар цуу, спортын ертөнцийн мэдээ мэдээллийг ард олондоо хүргэх ариун үүргийг үе үеийн спортын сэтгүүлчид хүргэж, таниулж ирсэн түүхтэй. Мөн биеийн тамир, спортыг түгээн дэлгэрүүлэх үйлсэд спортын сэтгүүлчдийн оролцоо чухал үүрэгтэй.

ОУССХ (AIPS)-ны гишүүний үнэмлэх нь Олимп, ДАШТ, тивийн АШТ-ээс эхлээд олон улсын тэмцээн уралдааныг хилийн чанадад сурвалжлан Монголчууддаа дамжуулан хүргэхэд тодорхой хөнгөлөлт эдлүүлдэг олон улсад хүлээн зөвшөөрөгдсөн чухал баримт бичиг юм.


Албан хаяг:
MONGOLIAN SPORTS PRESS UNION
PO box 123, Mongol shuudan 53
Khan-Uul district
Ulaanbaatar 17012

Холбоо барих: 

Б. Цагаанбаатар – Ерөнхийлөгч
Д. Батжаргал – Ерөнхий нарийн бичгийн дарга